जि. प. पिंपळगाव शाळेतील विद्यार्थ्यांना घडविले पुणे दर्शन, भारत पाटील यांचे दातृत्वाबद्दल कौतुक

भडगाव प्रतिनिधी - सुभाष ठाकरे

दि.26/02/24

भडगाव:- तालुक्यातील पिंपळगाव बु. येथील जिल्हा परिषद प्राथमिक शाळेच्या विद्यार्थ्यांसाठी पुणे दर्शन सहलीचे नुकतेच आयोजन करण्यात आले होते.

सहलीचा आर्थिक भार गावातील निस्वार्थ भावनेने समाजाची सेवा करणारे शांताराम पोपट पाटील यांचे चिरंजीव भारत पाटील यांनी उचलल्याने सहलीचे आयोजन व नियोजन करणे सहज शक्य झाले. भारत पाटील यांनी केलेल्या आर्थिक साहाय्यासाठी त्यांचे कौतुक केले जात आहे.

       पुणे येथे विद्यार्थ्यांची दोन दिवस सहल घेवुन जाणे म्हणजे प्रती विद्यार्थ्यी किमान २ हजार रुपये खर्च अपेक्षित होता. परंतु एवढा खर्च ग्रामीण भागातील जि. प. शाळेत शिकणाऱ्या विद्यार्थ्यांच्या पालकांना पेलवणारा नव्हता. गावातील शाळेचे माजी विद्यार्थी तथा इंजिनिअर भारत पाटील ह.मु पुणे यांनी सहलीसाठी पुढाकार घेत सुमारे ८० हजार रुपये सहलीचा खर्चाचा भार उचलुन विद्यार्थांना सहल घडविली. यात रेल्वे आरक्षण, बस भाडे, निवास व्यवस्था, भोजन व्यवस्था स्वखर्चाने उपलब्ध करून दिली. सुरवातीला विद्यार्थ्यांचा खर्च व लांबचा प्रवास यामुळे सहलीस पाठविण्यास पालक सकारात्मक नव्हते. शाळेतील शिक्षकांनी या चिमुकल्याना पुण्यातल्या ऐतिहासिक, सांस्कृतिक व धार्मिक ठिकाणांना भेट देण्याचा संकल्पच केला होता. सहलीचा प्रवास महाराष्ट्र एक्सप्रेसने पाचोरा रेल्वे स्टेशनवरून पुण्याकडे सुरू झाला. सहलीस ४० विद्यार्थी, शिक्षक, शाळा व्यवस्थापन समितीचे पदाधिकारी, पालक, असे एकूण ५५ जण सहभागी झाले होते. शनिवारवाडा, लालमहाल, नानावाडा, दगडूशेठ हलवाई गणपती, सारसबाग, राजीव गांधी सर्पउद्यान, पर्वती, प्रतिबालाजी, प्रतिशिर्डी, देहू, आळंदी इत्यादी ऐतिहासिक, सांस्कृतिक, शैक्षणिक व धार्मिक स्थळांना भेटी देत सहलीचा विद्यार्थ्यांनी

 पुरेपुअर आनंद घेतला. विद्यार्थ्यांना शुभेच्छा व निरोप देण्यासाठी संरपंच जयराम पाटील, प्राचार्य संजय पाटील उपस्थित होते. मुख्याध्यापक अरुण पाटील यांच्या मार्गदर्शनात, सहल प्रमुख सचिन पाटील व अमर बरडे यांनी सहलीचे उत्तम प्रकारे नियोजन केले. सदर सहलीसाठी शाळा व्यवस्थापन समितीचे अध्यक्ष रविंद्र पाटील, सदस्य संजय परदेशी, योगेश ठाकरे, दिवाणसिंग परदेशी, शिक्षणप्रेमी सुरेश पाटील, नरेंद्र पाटील, इंदल परदेशी, नामु दादा यांनी मेहनत घेतली.

 

-------चिमुकल्याचा आंनद तो माझा आनंद------- 

मी शाळा शिकत असताना ३०० रुपये सहलीची फी देण्याची परिस्थिती माझी नव्हती म्हणून मी सहलीला जाऊ शकलो नव्हतो, याची खंत मला वाटत होती. म्हणून माझ्या गावातील विद्यार्थ्यांना मोफत सहल घडवून आणली. शाळेतील चिमुकल्यांचा आनंद तोच माझा आनंद आहे. शाळेने मला संधी दिल्याबद्दल मनापासून अभारी आहे.

 -भारत पाटील पिंपळगाव (ह.मु. पुणे)